Krisi Ekonomikoa -
Greba, nazioartean
Sabino Cuadra Amaiurren diputatua, 'Financial Times'en azalean
Egunkari britainiarrak Mariano Rajoyren Gobernuaren murrizketen kontrako protestak eraman ditu lehen orrira, eta diputatu abertzalea jarri du albistearen irudi gisa.
Erredakzioa
Atzo Hego Euskal Herrian izandako greba orokorraren hotsak nazioartera ere zabaldu dira. Financial Times-ek Mariano Rajoyren Gobernuaren murrizketen kontrako protestak eraman ditu azalera, eta albistearen argazkian Sabino Cuadra Amaiurren diputatua ageri da, Espainiako Poliziaren kolpea jasotzen, Iruñean.
Egunkari britainiarrak erreportajea egin du murrizketen kontra egunotan egin diren protesten harira, eta tartean sartu du Hego Euskal Herrian atzo egindako greba orokorra.
Albistean jarritako irudian diputatu abertzalea ikus daiteke diputatu agiria erakutsiz, Espainiako polizia batek kolpatzen duen momentuan.
Argazki oinean honakoa irakur daiteke ingelesez: "Sabino Cuadra parlamentari espainiarra istiluetan euskal polizia batekin, atzo Iruñean".
Belgikan ere bai
Belgikako La Libre egunkarian ere protesten inguruko albistea argitaratu dute "Espainiak Europa kezkatzen jarraitzen du" lelopean, eta argazkian atzoko greba orokorreko manifestazioa ikus daiteke.
