Konklabea mugikorretik jarraitzeko aplikazioak

Aita santu berriaren izendapena mundu osoan gairik entzutetsuenetarikoa da egunotan. Hala ere, komunikabideak ez dira informazio bide bakarrak; izan ere, konklabea iPhonetik zein Android gailuetatik jarraitzeko aplikazioak daude eskuragarri. Horien artean, The Pope App aplikazio ofiziala nabarmentzen da.

Vatikanoko balkoitik Habemus Papam entzuteko gutxi falta da. Konklabeak 115 kardinal bildu ditu, Eliza katolikoaren agintari gorena aukeratzeko. Hori dela eta, garatzaileek iPhonerako hainbat aplikazio sortu dituzte gertakari horren detailerik ez galtzeko. Hala, besteak beste, azken albisteak, argazkiak, hautagaien profila eta bideoak eskuragarri egongo dira.

The Pope App da aita santuaren aplikazio ofiziala. Gizarte Komunikabideetarako Aita Santuaren Kontseiluak (Pontificium Consilium di Communicationibus Socialibus) garatu du, eta 2013ko Konklabea jarraitzea ahalbidetuko du. Hala, aita santua aukeratzeko beharko diren egunetan, asteetan edo hilabeteetan gertatzen denaren berri emango du horren bidez.

Doako aplikazio horrekin Vatikanoko Gobernuaren azken albisteak, argazkiak eta bideo ofizialak eskuragarri jarriko dituzte. Gainera, San Petri plazan dauden kamerak grabatzen dutena zuzenean ikusteko aukera eskaintzen du, 24 orduz. The Pope App aplikazioa iPhone, iPod Touch, iPad eta Android gailuekin bateragarria da, eta azken gertakarien berri jasotzeko zerbitzua aktibatzeko aukera ematen du.

Beste batek, Conclave aplikazioak, The Pope App-ek eskaintzen duenaren informazio osagarria ematen du, baina ingelesez. RSS sistema eskaintzen die, doan, Vatikanoaren albiste-kate ofizialei eta munduko komunikabide garrantzitsuenei. Gainera, Vatikanoko telebistaren streaming zerbitzua ematen du, kalitate handiko seinalearekin. Apple eta Android gailuekin bateragarria da.

Conclaveren indargunea 115 kardinal hautesleei buruz eskaintzen duen informazioa da, Vatikanoaren webgune ofizialetik ateratakoa. Gainera, faboritoak zein diren ikusteko aukera ematen du.

Bestalde, Elección Papa 2013 aplikazioa nabarmendu behar da. 0,89 euroko kostua du, eta iPhonerako artxiboko informazio gehien eskaintzen duen aplikazioa da. Aita santua hautatzeko azken albisteen historia eskaintzen du, beste hainbat datu bitxirekin batera: aita santu guztien zerrenda, gehien erabilitako izenak, zeregin horretan gutxien iraun dutenen zerrenda, eta abar.

Elección Papa 2013 aplikazioak aita santu izendatzeko probabilitate gehien duten 20 kardinalen biografia osoa eskaintzen du.