Gizartea -
Erasotzailea atxilotu dute
33 urteko emakume bat hil da Valentzian bikotekide ohiak lepoa moztuta
Gizonak Benaguasil herriko kale batean eraso egin zion neska lagun ohiari. Emakumeen aurkako indarkeriaren ondorioz 2013an hil duten lehenengo biktima da.
Erredakzioa
33 urteko emakume bat hil da Benaguasil herrian, Valentzian, ustez bere bikotekide ohiak lepoa moztuta. Gizona atxilotuta dago jada, Guardia Zibiletik jakinarazi dutenez.
Gertaera bart izan da, 22:00ak aldera, aipatutako herriko Cirilo Amoros kalean. Antza denez, gizonak emakumea sastatu zuen eta biktima lepoan eragindako zaurien ondorioz hil zen, Larrialdiak Koordinatzeko Zentroko iturriek zabaldu dutenaren arabera.
Atxilotutako ustezko erasotzaileak ez zuen emakumeen aurkako indarkeriarekin lotuta inolako aurrekaririk, aipatutako polizia-iturrien esanetan.
Emakume hau -2013ko emakumeen aurkako indarkeriaren ondorioz hil den lehenengo biktima- ez zen Benaguasilen bizi, bertoko Poliziak baieztatu duenez. Gertaeraren kontrako elkarretaratze bat deitu dute udaletxearen aurrean.
