Gazte bat kolpatzeagatik epaitu duten ertzainak gertaerak ukatu ditu

Ustez, 2009. urtean gazte bat borrarekin jipoitzeagatik epaitutako ertzain batek leporatutako karguak ukatu eta zauriak gazteak berak egin zituela ziurtatu du.

Arabako Probintzia Auzitegian eginiko epaia sententziaren zain geratu da, eta fiskalak urte eta erdiko kartzela zigorra ezartzeko erabakia mantendu du, agresio delitu bat egotzita. Horrez gain, biktimari 1.118 euroko kalte-ordaina emateko eskaera egin du.

Beste alde batetik, fiskalak 720 euroko isuna ezarri dio ustezko biktimari, aginpideen aurkako errespetu falta eta desobedientzia leporatu ostean.

Idatziaren arabera, 2009an izan zen gertaera, Gasteizen. Hiru gazte ibilgailu batzuen gainean salto egiten ari zirela ohartaraziz deia jaso ondoren, kalez jantzita bertaratu ziren Ertzaintzako hainbat agente.

Ihesaldia

Agenteek ez zituzten gazteak ibilgailu gainean harrapatu, baina inguruan hiru gazterekin egin zuten topo. Lekukoek emandako deskripzioarekin bat egin zuten gazteen, eta identifikatzeko eskatu zieten. Hiru gazte horietatik bik ez zuten identifikatu nahi izan, eta ihes egin zuten, Fiskaltzaren testuak azaltzen duenez.

Gazteetako bat harrapatu egin zuten, baina hark kontra egin eta akusatutako agenteari zauri arinak eragin zizkion, idatziaren arabera.

Zauriak orkatilan

Orduan atxilotuaren kideak agertu eta horietako bati desobedientzia falta inputatu zioten, aurretik identifikatzeari ezezkoa emateagatik.

Polizia operazioa bukatuta, Ertzaintzako agenteak gazteetako bati (ihes egiten saiatu ez zenari) kolpea eman zion eta zauriak eragin zizkion orkatilan, autoaren arabera.