Gizartea -
Ezbeharra
Benantxio Irureta mendizalea hil da Aneton
'Mahomaren pasabidea'n erori eta hil egin da. Beste 10 mendizalerekin zihoan istripua izan duen unean. Eguerdian helduko da bere hilotza Azpeitiara.
Erredakzioa
Benantxio Irureta 59 urteko mendizale azpeitiarra hil da larunbat honetan Aneto mendian, Euskadi Irratiak jakin ahal izan duenez. Autopsia egin diote gorpuari, eta eguerdian helduko da hilotza Azpeitiara.
Antza denez, "Mahomaren pasabidea"n erori eta hil egin da, eta istripuaren unean beste mendizale batzuekin zihoan. Aizarnarra zen jaiotzez, baina urteak zeramatzan Azpeitian bizitzen.
Mendizalea Coronas izoztegian atzeman eta gero, tontorretik 300 metrora, erreskate operazioa hasi da. Zaila izan da, helikopterorik bi espezialista eta medikua jatsi baitira bertara.
Jesus Mari Mendizabal Benantxioren lagun batek Benasquetik hurbil dagoen ospitaletik hitz egin du 'Hiru Erregeen Mahaia' saioan eta istripua "Mahoman" sartzerakoan gertatu dela esan du.
Atzo abiatu ziren Azpeititik eta kontatu duenaren arabera, istripua gertatu den unean 11 lagun zeuden.
Mendizale ezaguna
Josu Bereziartuarekin batera lehen zortzi milakoa igo zuen euskalduna izan zen.
Eskarmentu handiko mendizalea zen, besteak beste Himalayan, Alpeetan, Andeetan eta Pirinieotan mendi asko igotakoa.
Sakana-Pumori espedizioa
Benantxio Irureta Sakana-Pumori espedizioaren buru izan zen; bost euskal mendizale hil ziren espedizioaren buru hain zuzen.
2001eko urriaren 17an gertatu zen ezbeharra. Sakana-Pumori espedizioko 5 kide Pumori mendia (7.616 metro) igotzen ari ziren eta 6.000 metroko alturan zeudenean, elur jausi bat gertatu zen.
Sakana-Pumori espedizioan zazpi gipuzkoar eta hiru nafar joan ziren eta Iruretak berak berretsi zuen ezbeharra orduan uskadi Irratian.
