Renfe txartel bateratuaren sisteman sartzeko eskatuko du Gipuzkoak

Larraitz Ugarte Gipuzkoako Azpiegitura eta Mugikortasun diputatuak iragarri du Aldundiko ordezkaritza bat Sustapen Ministerioarekin bilduko dela Madrilen, lurraldeko txartel bateratuaren sisteman Renfe sartzea eskatzeko.

Batzar Nagusietako Mugikortasun eta Azpiegitura batzordean hitz egin du Ugartek eta "Mugi sistemaren ezarpena zuzena" izan dela adierazi du, nahiz eta % 2ko "akats txikiak" egon direla onartu duen.

Renfe sisteman sartzeko aukeraren inguruan galdetu diote hainbat alderdik, eta Ugartek azaldu du asteazkenean Madrilera joango direla Sustapen Ministerioko talde batekin gai horren inguruan hitz egiteko.

Guztira, 271.348 erabiltzaile izan ditu, horietatik 56.500 lagunek beherapenen onurak jaso dituzte, eta 100.000 eskari bideratu dituzte.

Joseba Antxustegi EAJko batzarkidearen kritikak errefusatu ditu; izan ere txartel bateratua martxan jartzea "kaosa" izan dela esan du "Bilduren aurreikuspen eza dela eta, nahiz eta orain urtebetetik zekiten Mugi iritsiko zela".

Horren harian, Ugartek salatu egin du "txartela indarrean sartu baino 16 egun lehenago" esan ziela Ana Oregi Ingurugiro sailburuak Jaurlaritzak ere parte hartuko zuela horretan.

Azkenik, herritarrak "pozik" daudela nabarmendu du, eta aurreikuspenean ez dutela asmatu onartu du; izan ere, eskaerei dagokienez, "aurreikuspen guztiak gainditu dira", gaineratu du.