Gizartea -
Hezkuntza
EAEko ikasleen % 97,30ek gainditu dute selektibitatea
Zuzenketa eskatzeko epea bihar irekiko da eta ekainaren 18ra arte egongo da irekita. Emaitzak, berriz, ekainaren 29an jakinaraziko dituzte.
Erredakzioa
EAEko ikasleen % 97,30ek gainditu dute selektibitatea, Euskal Herriko Unibertsitateak ohar bidez jakinarazi duenez.
Aurreko astean egin zuten unibertsitatera sartzeko hautaproba EAEko 8.758 ikaslek. Hautaprobak bi fase ditu: orokorra eta espezifikoa. Fase orokor hori gainditu beharra daukate ikasleek unibertsitate ikasketak egiteko; azterketa espezifikoak, berriz, kalifikazioa hobetzeko balio die ikasleei.
Fase orokorreko datuak kontuan hartuta, ikasleen % 97,30ek gainditu dute unibertsitatera sartzeko hautaproba.
Lurraldez lurralde, Gipuzkoan lortu dute gaindituen kopuru onena (% 98,88), Arabaren (% 98,44) eta Bizkaiaren (% 95,78) aurretik.
5.582 ikaslek euskaraz egin zuten selektibitatea eta 3.203k gaztelaniaz; euskarazko ikasleen % 98,42k gainditu dute, eta gaztelaniazkoen % 93,35ek.
Zuzenketa eskatzeko epea bihar irekiko da, eta ekainaren 18ra arte egongo da irekita. Azken emaitzak, berriz, ekainaren 29an jakinaraziko dituzte.
Selektibitatearen ezohiko deialdia uztailaren 3an, 4an eta 6an izango da.
