Gizartea -
Unibertsitatean sartzeko proba
Azken selektibitatea izan daitekeena hasi dute 11.500 ikaslek
Ostiralera bitartean, unibertsitatera sartzeko hautaprobak egingo dituzte Hego Euskal Herriko ikasleek.
Erredakzioa
Unibertsitatera sartzeko hautaprobak hasi dituzte, gaur, 11.500 ikaslek Hego Euskal Herrian. Lehen azterketa eguna pasata, ostegunean eta ostiralean azterketa gehiago izango dituzte.
Azkenean, Espainiako Gobernuaren LOMCE erreformak aurrera egingo balu, aurtengo selektibitatea azkena izango litzateke.
Probak bi fase ditu: orokorra eta espezifikoa. Lehenengoan, bost azterketa egingo dituzte: Gaztelania eta Literatura; Euskara eta Literatura; Historia edo Filosofiaren Historia; atzerriko hizkuntza eta Batxilergoaren bigarren mailako modalitateko gaia.
Fase espezifikoa borondatezkoa da, eta ikasleak unibertsitatean egin nahi dituen ikasketekin zerikusia duten arloetan ezagutzak eta arrazoitzeko gaitasuna erakustea du helburu. Fase orokorreko nota hobetzeko balio du.
Iaz, selektibitatea egin zutenen % 90ek gainditu zuten.
EAEn, 8.820 ikaslek egingo dituzte azterketak, hau da, iaz baino % 6,10 gehiagok.
Hazkundea lurralde guztietan nabaritu da. Izan ere, Bizkaian 4.336 gaztek egingo dute selektibitatea (% 7,10), Gipuzkoan 3.324k (% 6,3) eta Araban 1.160k (% 2,3).
Nafarroan, 2.718 ikaslek egingo dute proba, Iruñeko eta Tuterako campusetan. Iaz baino 10 pertsona gehiago izango dira.
Azken selektibitatea ote?
Jose Ignacio Wert Espainiako Gobernuaren Hezkuntza ministroaren erreformak aurrera egingo balu, aurtengo selektibitatea azkenekoa izango litzateke.
LOMCE legeak Batxilergoa amaitzean azterketa bat egitea aurreikusten du, baina ez unibertsitatean sartzeko, zentro bakoitzak nahi duen proba ezarri ahalko baitu.
Nolanahi ere, Cristina Uriarte Eusko Jaurlaritzaren Hezkuntza sailburuak erreforma hori Euskadin ez ezartzen saiatuko direla aurreratu du, "atzerapausoa" dela iritzita.
