Hiru mendizale desagertu dira Pakistanen, mendi bat igo ostean

Hiru mendizale desagertuta dira, joan den astelehenean Gasherbrum-I mendiaren gailurrera (8.068 metro) igo eta gero, Pakistango iparraldean. Tontorretik jaisten ari zirela, komunikazioa galdu zuten, 7.400 metroko altueran.

Desagertutako alpinistak Abel Alonso (Pontevedra), Alvaro Paredes (Valladolid) eta Xevi Gomez (Sarria de Ter, Girona), hirurak esperientzia handikoak, Javier Garrido Aragon Aventura agentziako arduradun eta espedizioaren antolatzaileak jakinarazi duenez.

Garridoren arabera, hiru eskalatzaileak Gasherbrum-Ien gailurrera heldu ziren duela hiru egun. Jaitsieran, arazoak izan zituzten eguraldiarekin, eta errefuxiatzeko eta bibak egiteko beharra ikusi zuten.

"Astelehen goizean izan zuten azken kontaktua kanpamentu nagusiarekin. Jaitsieran arazoak zituztela jakinarazi zuten, eguraldi txarragatik, eta, ezin zutenez aurrera egin, euren burua babestu behar izan zuten".

Orduan, 7.400 metroko altueran zeudela, komunikazioa eten zen. "Seguru asko, satelite bidezko telefonoak bateria barik geratu dira", azaldu du Garridok.

"Onik aurkitzeko esperantza dugu, nahiz eta altuera horiek zailtasunak dituztela jakin", adierazi du.

Hainbat mendizalek eta zamaketarik osatutako salbamendu-taldea gaur goizean irten da mendiaren zonalde garaienerako bidean. Gainera, eguraldi hobea dagoenez, baliteke helikoptero batek aire-errekonozimendua egin ahal izatea, Garridok kanpamentu nagusiarekin kontaktatu ostean jakinarazi duenez.