Gizartea -
Emakumeen kontrako indarkeria
Gizon bat atxilotu dute bikotekide haurdunari eraso egiteagatik
Durangon jazo da gertaera. Atxilotuak, 39 urtekoak, sorbaldan kolpe bat eman zion emakumeari eta, ondorioz, lurrera jausi zen. Gaur goizean epailearen esku utzi dute.
Erredakzioa
Ertzaintzak gizonezko bat atxilotu du bart Durangon bere bikotekideari, haurdun egonda, eraso egiteagatik, Segurtasun Sailak zabaldu duenez.
22:00etan atxilotu zuten gizona; Ertzaintzak Durangoko etxebizitza batera jo zuen emakumeen kontrako indarkeria delitu baten abisua jaso ostean.
Bertaratutakoan, emakume batek bere senarrak kolpe bat eman ziola azaldu zien agenteei. Kolpearen ondorioz, emakumea lurrera jausi zen. Haurdun zegoela ere esan zien agenteei.
Hori dela eta, erasotzailea atxilotu eta biktima osasun-etxera eraman zuten, medikuek artatu zezaten. Gaur goizean utzi dute epailearen esku.
