Gizartea -
Anberes
Egiluzen kasuarekin lotuta atxilotutako emakume bat libre utzi dute
45 urteko emakumeak gazte galdakaoztarraren sakelako telefonoa zuen atxilotu zutenean.
Erredakzioa
Belgikako Poliziak Hodei Egiluz Anberesen (Belgika) galdu zen gazte galdakaoztarrarekin lotuta atxilotu zuen emakume bat askatu du, Gazet van Antwerpen Anbereseko egunkariak jakitera eman duenez.
Carmen T. 45 urteko emakumea da libre utzi dutena, eta Egiluzen sakelako telefonoa zuelako atzeman zuten.
Emakumeak bere burua entregatu zuen Polizia bere atzetik zebilela ohartu zenean. Izan ere, Egiluzen sakelako telefonoa erosi egin zuela azaldu zuen, baina gaztearen berririk ez zuela.
Iragan astean utzi zuten libre, "isiltasun osoz", aipatu iturrien arabera. Egiluzen kasuarekin lotuta atxilotutako bost pertsonetako bat zen Carmen T. Gazte bizkaitarraren sakelako telefonoa edo kreditu txartelak edukitzeagatik atzeman zituzten atxilotuak.
Ilse Claes instrukzio epailearen azken erabakietako bat izan da emakumea libre uztearena; izan ere, beste epaile baten esku utzi dute orain auzia, Anbereseko hedabideek zabaldu dutenez.
Egiluz urriaren 19an galdu zen Belgika iparraldeko hirian, eta ordutik sekretupean dago hura bilatzeko ikerketa. Gaztea "ekintza kriminal baten biktima" izan zela pentsatzeko zantzuak daudela uste du Poliziak.
Hori horrela, gaztearen gorpua bilatzeko lanak egin izan dituzte Escalda ibaian zehar, baina ez dute ezer aurkitu.
Aurreko azaroaren 19an, galdu zela hilabete bete zenean, senideek eta lagunek kontzentrazioak egin zituzten bai Galdakaon (Bizkaia) bai Anberesen.
Ion Uribe herriko alkatea Belgikara joan zen Anbereseko alkatearekin hitz egitera eta ikerketak aurrera jarrai dezala exijitzera.
