Aste erabakigarria izango da Trintxerpeko kaltetuentzat

Aste honetan jakingo dute Pasaiako kaltetuek Jaurlaritzaren zenbat babes ofizialeko etxe erabilgarri izango dituzten eta etxebizitza horien egoera zein den. Data zehatzik ez dago babes ofizialeko etxeetako giltzak banatzen hasteko, baina, seguruenik, aste honetan bertan izango da.

Aurretik, Jaurlaritzak Pasaian eraikita dauzkan etxe horiek zein baldintzatan dauden ikusi nahi zuen Pasaiako alkateak, Amaia Agirregabiriak Euskadi Irratian azaldu duenez.

Asteartean, Pasaiako Udaleko eta Jaurlaritzako teknikariek bilera egingo dute, eta, bertan erabakitakoarekin, etzi jakinaraziko diete kaltetuei babes ofizialeko etxeetan birkokatzen hasiko diren edo Gipuzkoako Foru Aldundiaren babespean jarraituko duten.

Asteazkenean ere, Udalak aseguru-etxeekin bilera egingo du, polizen artean ezberdintasun handiak daudelako eta irtenbide bateratu bat adostu nahi dutelako.

Igandean, elkartasun jaialdia egin zuten Trintxerpen, eta, lau orduan, 4.500 euro eta material asko bildu zuten kaltetuei laguntzeko.