Haurtxoak izoztu zituen amaren kontrako entzunaldia hasiko dute bihar

Sanlucar la Mayorreko (Sevilla) epaitegiak, ustez haur jaioberriak hil eta izoztu zituen emakumearen aurkako epaiketa aurreko entzunaldia hartuko du bihar.

Fiskaltzak eta akusazioak 40 urteko kartzela zigorra eskatu dute Sara L.H.rentzat, hilketa delitua egotzita. Umeak, 2012ko azaroan aurkitu zituzten hilda, Pilasen (Sevilla) amak zuen etxebizitzako izozkailuan.

Epaiketa aurreko entzunaldian, epaiketarako beharrezkoak diren frogak aurkeztuko dituzte bi aldeek. Aurreikusitakoaren arabera, espetxetik atera, eta entzunaldian izango da emakumea. Dena den, baliteke haren abokatuak entzunaldiari uko egitea.

Akusazioak azpikeriaz egindako bi hilketa delitu egotzi dizkio, eta horri ahaidetasunaren larritasuna ere gehitu dio.

Sararen senarrak 2012ko azaroaren 9an lehen haurtxo izoztua hozkailuan aurkitu zuenetik prebentzioko espetxeratzea betetzen ari da. 2012ko azaroaren 27an bigarren haurtxo izoztu bat aurkitu zuen senarrak etxeko hozkailu bat garbitzen ari zela.

Haurrei egindako autopsien arabera, bi haurtxoak bizirik jaio ziren eta ondoren itota hil zituzten.

Haurtxoen amak epailearen aurrean egindako deklarazioan esan zuen haurretako baten erditzea bakarrik gogoratzen zuela, eta 2011ko ekainaren 25ean izan zela etxeko bainuontzian 11 eta 14 urteko bi semeak kalean zeudela.