3,3 milioi pertsona hil ziren 2012an, alkohol gehiegi edateagatik

3,3 milioi pertsona baino gehiago hil ziren munduan 2012an, alkoholaren gehiegizko kontsumoaren ondorioz, Nazioarteko Osasun Erakundek alkoholak osasunarekin duen harremanari buruz egin duen txosten baten arabera.

Alkoholaren gehiegizko kontsumoak dependentzia kaltegarri batera eta indarkeria igotzera eramateaz gain, 200 gaixotasun baino gehiago garatzeko arriskuarekin harremana du, giltzurrunen zirrosia eta minbizi mota batzuk barne, dokumentuan azaltzen denez.

Halaber, alkohola gehiegi edaten dutenek infekzio-gaixotasunak izateko aukera gehiago dituzte, besteak beste, tuberkulosia eta pneumonia.

Orokorrean, Europa pertsonako alkohol kontsumo gehien dagoen munduko eskualdea da, bereziki Ekialdeko Europan, indizeak oso altuak direlako bertan.

Europan alkoholaren kontsumoa egonkorra da, baita Amerikan eta Afrikan ere. Asia hego-ekialdean eta Mendebaldeko Pazifikoan, aldiz, gora egin du.

Alkoholaren kontsumoa zuzenean munduko biztanleriarekin erlazionatuz gero, batez beste, 15 urte baino gehiagoko pertsona bakoitzak urtean 6,2 litro alkohol huts edaten ditu.

Munduko herritarren erdiak baino gutxiagok kontsumitzen dute alkohola, beraz, estatistikaren arabera, kontsumitzaile bakoitzak urtean batez beste 18 litro alkohol huts edaten ditu.

Gizonezko gehiago emakumezkoak baino

Txostenak nabarmentzen duen beste puntuetako bat: emakumezkoak baino gizonezko gehiago hiltzen dira alkoholaren kontsumoarekin harremana duten arrazoiengatik (gizonezkoen % 7,6, emakumezkoen % 4rekin alderatuta), baina emakumezkoek arrazoi horregatik gaixo jartzeko aukera gehiago dute.

Bestalde, ikerketa burutu dutenek emakumeak geroz eta alkohol gehiago kontsumitzen dutela deitoratu dute.

Horrez gain, baliabide gutxien dituzten taldeak alkoholaren kontsumoak gehien kaltetzen dituela azpimarratu du txostenak, askotan tratamendu medikoa izateko sarbiderik ez dutelako, eta sare sozialaren eta familiarraren babesa txikiagoa delako.

Txostenak kide diren herrialdeetan alkoholaren kontsumoa murrizteko aholkuak jasotzen ditu, 66 naziok soilik dituztelako erregulatzeko legeak.