Gizartea -
Jarduera sismikoa
Castelloko lurrikarak Castor proiektuarekin lotu ditu txosten batek
Espainiako Geografia Institutuak egindako txostenak ateratako ondorioa da. Datuen arabera, azken bi hilabeteetan bikoiztu egin da azken mendean izandako lurrikaren kopurua.
Erredakzioa
Castelloko kostaldean 2013ko udan izandako lurrikarek "harreman zuzena" dute Castor gas biltegiaren jarduerarekin, Espainiako Geografia Institutuak egindako txostenaren arabera.
Txostenean ageri denez, Castor proiektuaren jarduerak pilaketa sismotektoniko prozesu bat martxan jarri du. Prozesu hori aurretik ere zegoen, baina bereizi gabe.
2013ko abuztuaren amaieran, Castorreko biltegian gas txertaketa egin zuten Vinarozeko kostaldetik 20 kilometrora, eta aldi berean lurrikarak eman ziren, Richter eskalan 3,5 gradukoak. Ondorioz, irailaren erdialdera, Industria, Energia eta Turismo Ministerioak jarduerak geldiarazi zituen txertaketen eta lurrikaren artean erlaziorik zegoen ala ez aztertzeko.
Espainiako Geografia Institutuak 2013ko irailaren 5ean antzeman zuen lehenengoz jarduera sismikoa, eta egunero arreta berezia ematea erabaki zuen. Hasiera batean, epizentroa gas plataformaren inguruan antzeman zuten.
Jose Manuel Soria ministroak behin baino gehiagotan esan zuen jarduera ez zutela berreskuratuko eremu osoan segurtasuna bermatu ezean. Horretarako txosten teknikoak eskatu zituzten irailaren 26an.
Azken mendean izandako lurrikaren bikoitza
Ikerketak irailaren 4aren aurretik izandako sismologia eta sismologia historikoa alderatzen ditu. 1920tik 2013ko irailaren 1era arte 203 lurrikara izan ziren 3,3ko gehienezko indarrarekin.
Hala ere, Castor proiektua hasi zenetik eta Ministerioak jarduera eten zuen arte, 512 lurrikara izan ziren (irailaren 5a eta urriaren 15a artean).
