Gizartea -
Frantzia hegoaldean
Ama batek irakasle bat hil du ikasleen aurrean, Tolosatik gertu
Jatorri marokoarreko eta nazionalitate espainiarra duen ustezko erasotzaileak (47 urte) aurrekariak ditu 15 urteko adingabe bat abandonatu eta bilaketa lanak oztopatzeagatik.
Erredakzioa
Ama batek 34 urteko irakasle bat hil du gaur, ikasleen aurrean, labankadaz, Frantzia hegoaldeko Albi hirian (Tolosatik gertu), Fiskaltzak aditzera emandakoaren arabera.
Ustezko hiltzailea 20 minutu geroago atxilotu du Poliziak, eta eskolan zeuden adingabeak ikastetxetik atera dituzte.
Gertaera goizeko lehen orduan izan da, Edouard Herriot eskola publikoan, ikasturteko azken egunean. Eskolan 284 adingabek ikasten dute, eskolaurrean eta lehen hezkuntzan.
Ustezko erasotzailea 47 urteko jatorri marokoarreko eta nazionalitate espainiarreko emakume bat da, eta aurrekariak ditu 15 urteko adingabe bat abandonatu eta bilaketa lanak oztopatzeagatik.
Osasun zerbitzuetako langileak iritsi direnerako, biktimak bihotz-birikak geldituta zituen, eta handik bi ordura hil da.
BFM TV telebista katearen arabera, irakasleari eraso egitean "ni ez naiz lapurra" oihukatu du hiltzaileak. Azterketa psikiatrikoak egin dizkiote.
Claude Derens fiskalak prentsari adierazi dio erasotzailea ospitale psikiatriko batera eraman dutela, lehen azterketa baten ostean, emakumeak "adierazpen ulergaitzak" eskaini dituelako.
Azterketa horretan "arazo mental larriak" atzeman dituzte medikuek, "eldarniozko jazarpen ideiak" omen baititu erasotzaileak, haren pentsamenduei eragiten dizkienak.
François Hollande Frantziako presidenteak gertatutako "drama izugarria" deitoratu du, eta Benoît Hamon Hezkuntza ministroak adierazi du "ikastetxe barruan eta kanpoan indarkeriaren aurka aritzeko beharra" erakusten dueña hilketa horrek, "zentroak, irakasleak eta ikasleak" babestu ahal izateko.