Sei atxilotu Can Vies zentroan maiatzean izandako istiluengatik

Eskuadrako Mossoek sei pertsona atxilotu dituzte, Bartzelonako Sants auzoko Can Vies zentro okupatuaren eraisketa zela eta, maiatzean izandako protesta eta istiluekin ustez lotura izateagatik.

Kataluniako poliziak gaur jakinarazi duenez, Bartzelona inguruko zenbait herritan egin dira atxiloketak gaur goizean, eta polizia operazioak zabalik jarraitzen du; beraz, posible da atxiloketa gehiago izatea.

20 eta 40 urte arteko bost espainiar eta italiar bat atzeman dituzte Mossoek, eta desordena publikoa, kalteak, agenteen aurkako erasoak eta oinarrizko eskubideen eta askatasun publikoen inguruko delituak egotzi dizkiete.

Atxilotuetako batek Maiatzaren Leheneko manifestazioan izandako istiluekin lotura duela adierazi dute Mossoek.

Kataluniako poliziaren balantzearen arabera, 72 dira guztira istilu horien harira atxilotuak; gainera, maiatzean ia 300 pertsona identifikatu zituzten, eta eragindako kalteek 400.000 euroko kostua izan zuten.

Astebete iraun zuten eraikina hustearen eta eraistearen aurkako protestek, maiatzaren 26tik 3ra. Azkenean, Udalak eraisketa bertan behera uztea erabaki zuen, eta okupak bertara itzuli ziren.

Atxiloketen aurrean, Can Viesek Eskuadra Mossoen Les Cortseko komisaldegi aurrean kontzentrazioa deitu du, eta adierazpen batean sei kideak kargugabetzea eta aske uztea eskatu du.

Eraikina hustu ostean, "herriaren indarrak gora egin zuen, eraisketa eragotziz, eta elkartasun uholde bat sortu zuen" adierazi du Can Viesek. Atxiloketei begira, errepresioaren aurka berriro altxatuko direla iragarri du.