Hiru emakumek sexu-erasoak salatu dituzte Abadiñon

Abadiñoko (Bizkaia) hiru emakumek, ama batek eta bi alabek (horietako bat adingabea da), sexu-abusuak salatu dituzte, hainbat hedabidek gaur jakinarazi dutenez. Hain zuzen ere, sendiaren lagun batek egin ei dizkie abusuak.

Ustezko erasotzailea, 40 urtekoa, asteazkenean atxilotu zuten, baina epaileak aske utzi zuen, emakumeengandik urruntzeko agindua eman ondoren.

Antza denez, gizonezkoak lau urtez egin zizkien abusuak amari eta alaba zaharrenari. Adingabeari azken egunetan egin omen dio eraso, eta horrek salatu duelako jakin da gertatutakoa.

Emakumeen elkarteek elkarretaratzea deitu dute biharko, 19:00etan, Abadiñoko Txanporta plazan. Udalak gaitzetsi egin ditu eraso matxistak.