Gizartea -
Emakumeen aurkako indarkeria
Emakume haurdun bati eraso dio bikotekide ohiak Bilbon
Ustezko erasotzailea, 35 urteko gizon bat, atxilotu egin du Ertzaintzak. Tratu txarren aurkako telefonoa: 016.
Erredakzioa
Ertzaintzak 35 urteko gizonezko bat atxilotu zuen atzo arratsaldean Bilbon, bikotekide ohiari erasotzea egotzita. Emakumezkoa haurdun dago, eta ospitale batean artatu behar izan zuten.
Eusko Jaurlaritzako Segurtasun Sailak azaldu duenez, atzo, 16:40an, pertsona batek Ertzaintzari deitu zion, lagun bati bikotekide ohiak eraso ziola salatzeko.
Gizonezkoak emakumearengandik urruntzeko agindua du, baina emakumea haren etxera joan zen, sakelako telefono bat itzultzea eskatzeko, biktimak berak ertzainei azaldu dienez.
Agenteek kalean atxilotu zuten ustezko erasotzailea, eta, polizia-izapideak bukatu eta gero, epailearen aurrean eramango dute.
Tratu txarrak pairatzen badituzu edo biktimaren bat ezagutzen baduzu, kontuan hartu gida honetako aholkuak edo deitu 016 telefono-zenbakira; doakoa da eta ez du arrastorik uzten fakturan.
