Gizartea -
Curriculum dekretua
Heziberri berregiteko eskatu dio Ikastolen Elkarteak Jaurlaritzari
Hezkuntza Sailak helarazitako zirriborroan LOMCEren eragin nabarmena ikusten du Ikastolen Elkarteak. Curriculum dekretua berrikusi eta berregiteko eskatu dio Ikastolen Elkarteak Exekutiboari.
Erredakzioa
Heziberri 2020 planaren epea amaitzear dagoenean, sindikatuek, eskola publikoak zein oposizioko taldeek egin dizkioten kritikei gehitu zaizkio gaur Ikastolen Elkarteak egin dizkionak.
Eusko Jaurlaritzak urriaren amaieran hezkuntza eragileei aurkeztu zien curriculum dekretuaren gaineko balorazioa eman du jakitera Ikastolen Elkarteak, Euskadi Irratiak jakitera eman duenez.
Hezkuntza Sailak helarazitako zirriborroan LOMCEren eragin nabarmena ikusten du Ikastolen Elkarteak. Gauzak horrela, curriculum dekretua berrikusi eta berregiteko eskatu dio Ikastolen Elkarteak Hezkuntza Sailari.
Marko pedagogikoa gelara eramateko irizpideetan euskara ardatz duen eleaniztasuna, ebaluazioaren planteamendua zein edukia zehaztea eta euskararen eta euskal kulturaren dimentsio espezifikoa zehaztea eskatu du Ikastolen Elkarteak, hezkuntza sistema propioa eraikitzeko ezinbesteko urratsak direla adierazita.
