Gizartea -
Asunta Basterraren hilketa
Kasualitatea edo ironia hutsa
Ainhoa Furundarena ETBko albistegietako kazetaria Galizian da, Asunta Basterra neskatoaren hilketaren epaiketa jarraitzen.
Ainhoa Furundarena | ETB
Kasualitatea edo ironia hutsa. Auskalo. Gaur Asunta Basterrak 15 urte bete beharko zituen. Eta gaur, bere gurasoak akusatuen eserlekuan daude, bere alabaren biziarekin amaitu zuten ala ez jakiteko epaiketan.
Eta a ze nolako epaiketa. Oso mediatikoa. Ehun komunikabide inguru gaude akreditatuta. Santiagoko epaitegiak ez du inoiz horrelakorik ikusi. Horren adibide, hauexe: ezkontza aretoan ari dira epaiketa egiten, lekuarengatik. Eta prentsarako beste areto berezi bat prestatu behar izan dute. Halare, hainbat kazetari lurrean eserita ikusi ditut gaur.
Akusatuak ikusteko gogoa, morboa eta ikusmina denon artean bata bestearen atzean egon dira eserita, bakoitza bere abokatuarekin. Rosario Porto, burumakur, lotsatuta bezala. Alfonso Basterra, tente, adi eta seguru. Jarrera zeharo ezberdinak.
Gaur behin eta berriro entzun dugu ustez zer egin zuten eta ze frogak dauden. Baina Asunta hil baldin bazuten, zergatik egin zuten? Ez zuten alaba euren artean nahi? Litekeena da hori guztia laister argitzea.
