Gizon bat erreskatatu dute Arga ondoan dagoen ubide batean, Iruñean

Hipotermia zantzuak zituen pertsona bat erreskatatu dute Arga ibaitik gertu dagoen ubide batean, Iruñeko Udaltzaingoak jakitera eman duenez. Biktima Nafarroako Ospitalera eraman behar izan dute.

41 urteko gizona Caparrosoren Errotako bidean erreskatatu dute, Igeriketa Klubaren pasabidean, Diario de Navarra hedabideak zabaldu duenez.

Gertakaria 03:35 aldera jazo da. Udaltzaingoa, suhiltzaileak eta anbulantzia bat bertaratu dira.

Bestalde, Udaltzaingoak 160 deiri erantzun behar izan die asteburuan. Besteak beste, bederatzi eraso edo borroka izan dira, eta edukiera kontrol batzuk egin dituzte tabernetan, horietako bat Alde Zaharrean. Agenteek salaketa jarri dute horietako baten kontra, gehienezko edukiera gainditzen zuelako.

Gainera, 13 zirkulazio-istripu izan dira asteburuan, eta lau pertsona arin zauritu dira ezbehar horietan.