Horrela helduko dira Hiru Erregeak Hego Euskal Herrira

Errege Magoen ibilbidea Jesusen Bihotza plazan hasiko da, Bilbon, 18:00etan, Radio Euskadik jakitera eman duenez. Hamar karrozek udaletxean amaituko dute kalejira. Glutenik gabeko ia 3,5 tona gozoki banatuko dituzte.

Gaurko eguna luzea izan behar zutela bazekiten, eta Hiru Erregeak atzo heldu ziren Bilbora. Atseden hartzera joan baino lehen, haurrentzako zenbait mezu utzi zituzten.

Bestalde, Errege Magoak gaur heldu dira Gasteizera trenean, 11:00etan. Desfilea 19:00etan hasiko da, Bilbo Plazan, eta Arabako hiriburuaren erdialdea zeharkatuko du Gasteiz Etorbideraino. Sei karroza izango dira eta bidezko merkataritzako piruletak banatuko dituzte.

Maiestateak Donostiara 15:00ak aldera helduko dira, konkretuki, Kontxara. Kalejira 18:00etan hasiko da Hernani kalean, eta Boulevardera helduko da. Hiru karroza izango dira.

Hiru Erregeak Iruñera Magdalenako zubitik helduko dira. Nafarroako hiriburuaren ibilbideari 19:00etan hasiera emango diote. Kalejira Abejeras kaletik Arrieta kalera joango da. Berorien maiestateak ‘Pasolargo’, ‘Rubia’ eta ‘Copito’ dromedarioek lagunduko dituzte.