Berangoko sutea nahita piztu zutela susmatzen du Ertzaintzak

Ertzaintza abenduaren 27an Berangon piztu zen eta 200 hektarea kiskali zituen sutea ikertzen ari da, nahita piztuta izan zela susmatzen baitu.

Elena Unzueta Bizkaiko Iraunkortasun eta Ingurugiro diputatuak esan du sutea nahita piztu izana dela hipotesi nagusia, teknikariek baztertu egin dute eta jatorria naturala (tximistaren bat) edo norbaiten utzikeriaren ondorio izatea.

Diputatuak ez du gaiaren inguruko xehetasun gehiago eman nahi izan, Ertzaintzaren eskumena delako eta ikerketan eraginik ez izateko.

Unzuetak prentsaurreko batean azaldu duenez, Berangoko suteak 200 hektarea kiskali zituen 11 kilometroko perimetroaren barruan, eta garrak Sopelara eta Urdulizera ere iritsi ziren.

Jabetza pribatukoa zen erretako ia eremu guztia, eta eukaliptoak eta pinuak ziren nagusi.