Polizia-auto bat lapurtu eta agente bat harrapatzeagatik atxilotu dute

Mungiako Udaltzaingoak 21 urteko gizon bat atxilotu du gaur goizeko 10:15ean, Udaltzaingoaren auto ofizial bat lapurtzea eta agente bat nahita harrapatzea leporatuta, haren ihesaldia saihesten ari zenean. Hala eman du jakitera Mungiako Udaltzaingoak berak.

Aipatutako auto ofiziala Gatikan utzi du, BI-634 errepideko errail batean. Atxiloketa ekarri gertaerez gain, eragin dituen kalteak egozten zaizkio.

Jazoerak 05:10ak aldera hasi dira, Mungiako Udaltzaingoaren bi patruila bi gazteren arteko liskarrean bitarteko lanak egitera joan direnean, Aurelio Artetxe kaleko aparkalekuan.

Behin egoera lasaituta, handik metro gutxira beste liskar bat piztu da, oraingo honetan jendetsua; horren aurrean, patruila biak oinez bertaratu dira.

Polizia-lanak egiten hasi direnean, agenteek auto ofizialetako bat zeuden tokitik alde egiten ari zela ikusi ahal izan dute, pertsona ezezagun batekin barruan.

Patruila bat haren atzetik abiatu da, beste bi agenteak korrika joan direlarik oinezkoentzako gunetik zehar, ihes egindako ibilgailua geldiarazteko asmoz, Lauaxeta kaleko 2. zenbakira iritsi arte.

Galtzadako albo batean jarri dira, baina ibilgailuak norabidea aldatu eta eurengana jo du eta udaltzainetako bat harrapatu du. Beste udaltzainak autoa saihestu ahal izan du.

Zaurituta zegoen agenteari laguntza emateko gainontzeko agenteek jazarpenari utzi diote. Autoak harrapatu duen agentea Gurutzetako ospitalera eraman dute zauriak artatzeko.

Gerora, 06:00ak aldera, Ertzaintzaren dei batek lapurtutako autoa Bi-634 errepideko errail batean, Gatikan, alde batera utzita aurkitu dutela jakinarazi du.

Horren aurrean, ikerketak Gatikara mugatu dira, eta lekuko batzuen testigantzak bildu ostean, jazoeraren ustezko egilea nor izan den identifikatzea lortu dute.

Gauzak horrela, Ertzaintzak, Mungiako udaltzainen laguntzarekin, 21 urteko gizonezko bat atxilotu dute, bere etxebizitzan lo egiten zegoela, autoa aurkitu duten lekutik 200 bat metrora.

Behin atxilotuta, Mungiako udaltzaingoaren polizia-etxera eraman dute, arratsaldeko 17:00etan Gernikako Guardiako Epaitegiaren aurrean agerrarazteko.