Gizon bat atxilotuta, alkohola edanda eta baimenik gabe gidatzeagatik

27 urteko gizonezko bat atxilotu dute Gasteizen, gidatzeko baimenik gabe eta alkohola edanda gidatzeagatik. Arabako Udaltzaingoak jakitera eman duenez, gainera, gizonezko hori bilatzeko eta atxilotzeko agindua zegoen, espetxe-zigorra duelako betetzeko.

Atzo goizeko lehen orduan atxilotu zuten, Manuel Iradier kalean. Ilun zegoen eta argiak piztu gabe zituen ibilgailu bat ikusi zuen Udaltzaingoak; gelditzeko eskatu zioten gidariari, eta alkoholemia froga egin ziotenean, baimendutako tasa lau aldiz gainditu zuen. Ez zuen gidatzeko baimenik.

Epaileren esku utzi dute gizona, bide-segurtasunaren kontrako delitua egotzita, alkohola edanda eta baimenik gabe gidatzeagatik.