Gizartea -
ATXILOKETA
Gizon bat atxilotu dute Bizkaiko bi farmaziatan lapurtzea egotzita
Horri leporatzen zaizkion azken lapurretak ekainaren 4an eta 14an gertatu ziren, Bilboko Deusto auzoan eta Barakaldoko San Vicente auzoan.
Agentziak | Erredakzioa
Ertzaintzak 45 urteko gizonezko bat atxilotu du Bilboko eta Barakaldoko farmazia banatan larderia erabiliz lapurreta egin izana egotzita.
Susmagarria ohiko gaizkile bat da, antzeko gertakariengatik delitu-historia luzea duena, hain zuzen. Horri leporatzen zaizkion azken lapurretak ekainaren 4an eta 14an gertatu ziren, Eusko Jaurlaritzako Segurtasun Sailak ohar baten bidez jakinarazi duenez.
Ekainaren 4an, dirudienez, Deustuko farmazia batean sartu zen, langileak mehatxatu zituen dirua emateko eskatu ostean, eta botikaren atzeko partean giltzapean utzi ondoren, alde egin zuen, oinez.
Handik hamar egunera, Barakaldoko San Vicente auzoan, antzeko gertakari bat izan zen, 16:00ak aldera.
Lapurrak eskuak poltsikoan sartuta zituela sartzen zen farmazian, arma bat izango balu bezala. Ondoren, bertan zeudenak biltegian utzi ondoren, oinez joaten zen.
Susmagarria ostegunean, ekainaren 16an, atxilotu zuten, eta azken orduotan utzi dute epailearen esku.