Gizartea -
Indarkeria matxista
Gizon batek emaztea eta bi alaba hil ditu Angelun
Gizonak tiroka hil ditu, etxean bi orduz atxikita eduki ostean, eta, ondoren, bere buruaz beste egin du. Gaur, kasuaz argibide gehiago emango ditu Baionako prokuradoak.
eitb.eus
Emaztea eta bi alaba hil ditu ustez gizon batek Angeluko (Lapurdi) etxebizitza batean.
Sud Ouest egunkariak jakinarazi duenez, gizonak bi orduz atxikita izan ditu emaztea eta 16 eta 11 urteko bi alaba, eta, ondoren, tiroz hil ditu eta bere buruaz beste egin du. Guztira, hiru alaba zituzten senar-emazteek.
Antza denez, igandean gertatu ziren hilketak, baina atzo topatu zituzten gorpuak. Krimena Belle Marion kalean jazo da.
Bilkura
Lapurdi kostako herria astindu dute hilketek, Frederick Del Val, ustezko hiltzailea, oso ezaguna baitzen: UMPko militante ohia, azken udal hauteskundeetan Claude Olive (UMP) egungo alkatearen aurka egiteko zerrenda aurkeztu zuen, eta horregatik kanporatu egin zuten alderditik.
Gaur, kasuaz argibide gehiago emango ditu Baionako prokuradoak.
Mugimendu feministak gogor salatu ditu hilketak, eta elkarretaratzera deitu du etzirako; Angeluko herriko etxearen aurrean egingo dute bilkura, ostiralean, 18:00etan.
