Gizartea -
Indarkeria matxista
Emakume bati sexu-erasoa egin diote Hernanin, ustez bikotekide ohiak
32 urteko gizona atxilotu du Ertzaintzak, eta epaileak espetxera igorri du.
Agentziak | Erredakzioa
Epaileak 32 urteko gizonezko bat espetxeratzeko agindua eman du, bere bikotekide ohiari sexu-erasoa egitea egotzita, Segurtasun Sailak jakitera eman duenez.
Erasoa joan den astelehenean izan zen, 18:00etan, biktima gizonaren etxera bertaratu zenean, bisita egitera. Orduan, akusatuak ustez eraso egin zion, ‘’emakumea indarrez menderatu ostean’’.
Etxebizitzatik alde egin eta Ertzaintzarengan jo zuen emakumeak, gertatutako salatzeko. Jarraian Donostia Ospitalera igorri zuten, han azterketa egin ziezaioten.
Ondoren, Ertzaintzak gizona atxilotu zuen, sexu-erasoa eta genero-indarkeriaren delituak egotzita.
Epaile aurrera igorri ostean, hark espetxeratzeko agindua eman du.
_________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
