Osakidetzak zerbixeko minbizia antzemateko probak egingo ditu

Osasun Sailak iragarri du zerbix edo utero-lepoko minbizia antzemateko bahetze programa bat jarriko duela martxan, 21 eta 65 arteko emakume guztientzat. Era berean, haurren obesitateari aurre egiteko plana eta elikadura osasuntsuari buruzko estrategia abiaraziko dituela jakinarazi du.

Jon Darpon Osasun sailburuak agerraldia egin du Eusko Legebiltzarrean datozen lau urteotarako erronka nagusiak azaltzeko asmoz.

Darponen esanetan, neurri zehatzak hartuko dituzte ospitale eta osasun zentroetan itxarote-zerrendak murrizteko eta C hepatitisa duten paziente guztiak artatzeko. Horrez gain, aholkularitza kontseilu bat eratuko dute parkinson edo alzheimer bezalako endekapenezko gaitzen diagnostiko goiztiarra egiteko.

Bestalde, Osakidetzan euskararen erabilera bultzatzeko apustua egin du eta hizkuntza normalizaziorako plana zentro kontzertatuetara zabaltzearen alde agertu da.

Bi urtean behin lan-eskaintza publikorako deialdi bat egiteko asmoa iragarri du, lehendizikoa, 2017an izango litzateke, 2016ko plazak aterata.

Horrez gain, kopago farmazeutikoaren kontrako errekurtsoa eta sendagaiak erosteko adinekoei zuzendutako laguntzak mantenduko dituztela berretsi du.

Ildo horretan, Darponek adierazi du Eusko Jaurlaritzak ez duela baztertu erizainen eginkizunen inguruko araudi propio bat lantzea, Espainiako Gobernuak erizainen jarduerari ezarritako mugaren kontra aurkeztutako helegitea aintzat hartzen ez badute.