Behin-behineko udaletxea hustu dute Bermeon, sute baten ondorioz

Bermeoko kultur-etxea hustu behar izan dute astearte honetan, Aurrekoetxea kaleko aparkaleku batean piztutako sutearen ondorioz. Eraikin horretan behin-behineko udaletxea dago.

Udaletik jakinarazi dutenez, sua 12:30ean piztu da, eta, badaezpada ere, kultur-etxea eta aparkalekua bera itxi behar izan dituzte.

Suhiltzaileak bertaratu dira, eta 14:00ak aldera lortu dute sugarrak kontrolatzea. Babes Zibila eta Udaltzaingoa ere bertan izan dira.

Kultur-etxeak Udalaren Pertsonal saila eta lehengo udaletxean zeuden udal zerbitzuak hartzen ditu.

Udaletxea itxita dago 2013tik, urte hartan piztutako sutearen ondorioz.