Gizartea -
Huescan
Panticosan desagertutako Aretxabaletako mendizalearen gorpua aurkitu dute
Erreskate-taldeek astelehen honetako arratsaldean topatu dute gorpua. Ostiralean desagertu zen, bakarrik ibilbide bat egitera irten ostean, goi-mendiko gune batean.
Erredakzioa
Guardia Zibileko zenbait espezialistak Aretxabaletako mendizale gaztearen gorpua topatu dute arratsalde honetan Balaitus mendian, Huescako Pirinioetan. Baliteke 20 urteko mendizaleak 150 metroko erorikoa pairatu izatea, aipatutako Balaitus mendia jaisten ari zela.
Goi-mendiko hainbat gunetan egindako bilaketa sakona eginda, erreskate-taldeko kideek gaztearen gorpua topatu dute, 16:45ean, haitzetan; istripua jasan zuen puntuaren oinean aurkitu dute.
Gorpua Jakako Ospitalera eraman dute, familia bertan dago eta.
Ostiraletik desagertuta
Hildakoa ostiralean irten zen Respomusoko aterpetxetik, xede izanik Balaitus mendira igotzea, bera bakarrik. 3.144 metroko altuera du mendi horrek.
Jakara gauean bueltatu ez zenez, familiakoek Guardia Zibilera jo zuten, desagerpenaren berri emateko.
