Gizartea -

Ingurumena

2020an gas emisioak % 30 murrizteko konpromisoa hartu du Euskadik

Epe luzeago batera, emisioak % 80 murriztea eta energia berriztagarriak gutxienez % 40 areagotzea planteatzen du klima-aldaketaren aurkako EAEren estrategiak.

Petronor konpainiaren lantegia Muskizen (Bizkaia). Artxiboko irudia: EiTB
Petronor konpainiaren lantegia Muskizen (Bizkaia). Artxiboko irudia: EiTB
Petronor konpainiaren lantegia Muskizen (Bizkaia). Artxiboko irudia: EiTB

Agentziak | Erredakzioa

Whatsapp Facebook Twitter Telegram Email

2005eko isuriekin alderatuta, 2020an berotegi efektuko gasen emisioak % 30 murrizteko konpromisoa hartu du gaur Iñaki Arriola Ingurumen, Lurralde Plangintza eta Etxebizitzako sailburuak Bruselan.

Arriola Miguel Arias Cañete Europako Klimaren Aldeko Ekintza eta Energia komisarioarekin bildu da arratsaldean, Belgikako hiriburuan. Ekintzak koordinatu eta klima-aldaketaren ondorioei aurre egiteko neurriak mahai gainean izan dituzte bi arduradunek.

Bileran, fenomenoari egokitzeko eta aurre egiteko Europaren jarraibideak ezagutu ditu sailburuak, eta Euskadik egindako lana azaldu du, Eusko Jaurlaritzak jakitera eman duenez.

Jaurlaritzaren helburuetako bat karbono gutxi sortzen duen ekonomia bat lortzea da, eta baita 2020rako berotegi efektuko gasen emisioak % 30 murriztea ere.

Epe luzeago batera, emisioak % 80 murriztea eta energia berriztagarriak gutxienez % 40 areagotzea planteatzen du klima-aldaketaren aurkako EAEren estrategiak (Klima 2050).

Ekonomia zirkularra

Bestalde, ekonomia zirkularra hondakinak murriztu eta merkatuan lehengai gisa berriz barneratzeko modu bezala defendatu du Arriolak, klima-aldaketaren aurkako borrokan.

Sektore horretako enpresek urtero 3.600 milioi euro inguru fakturatzen dituzte EAEn. Sailburuaren ahotan, “horrek eredu aldaketari bultzada ematen dio”.

Hau zure interesekoa bada, baliteke beste gai hauek ere izatea
Eusko Jaurlaritza berriak Bruselaseko albisteak gaur EAE albisteak Albisteak Gaur Albisteak Euskal Herriko kutsadura