Gizartea -
Itzulera
Ondarroan etxetik irtenarazi zituzten azken zazpi familiak itzuli egin dira
Lur-jauzi baten ondorioz, 176 familiak etxetik atera behar izan zuten, 2016ko martxoan, Kamiñalde auzoan, baina pixkanaka-pixkanaka itzultzen joan dira.
Agentziak | Erredakzioa
2016ko martxoaren 8an lur-jauzi baten ondorioz Ondarroan (Bizkaia), Kamiñalde auzoan, etxetik irtenarazi zituzten azken zazpi familiak bertara itzuli dira ostiral honetan, eraikinak birgaitzeko obrak amaitu ostean.
"Hilabete oso gogorrak izan dira, baina honelako tamainako arazo bati irtenbideak emateko gai izan garela esan dezakegu gaur", nabarmendu du Zunbeltz Bedialauneta alkateak.
Zunbeltz Bedialauneta Ondarroako alkatea. Argazkia: Ondarroako Udala
Hala ere, lehen zinegotziak ohartarazi du Kamiñaldeko arazoa ez dela amaitu, izan ere, mendi-magala egonkortzeko obren azken fasea amaitzeko dago, baita lurraldeetako jabeekin konponbidea aurkitzeko eta itxita jarraitzen duen bidea irekitzeko.
Halaber, Bedialaunetak azaldu duenez, beste erakundeengandik jasotako laguntzak "ez dira nahikoa izan", eta, horregatik, Udalak zor "handi" bati aurre egin beharko dio.
Eusko Jaurlaritzak 2,3 milioi euro zuzenduko ditu, eta Bizkaiko Foru Aldundiak 2,5 milioi jarriko ditu, Ondoarroako Udalari bi milioi euroko mailegu bat eskaintzeaz gain, udal kutxako diruarekin aurre egin ahal izateko. Horri gobernuak jarritako 2,18 milioiak gehitu behar zaizkio.
Gainera, Ondarroako Udalak bost milioi euroko mailegu bat eskatu du, Kamiñaldeko lanengatik sortutako zorrari aurre egin ahal izateko, udalerriaren urtebeteko aurrekontuaren erdia, alegia.
