Etxebarri eta Azurmendi, Europako hirugarren eta bosgarren jatetxerik onenak

Axpeko Etxebarri Erretegiak eta Larrabetzuko Azurmendi jatetxeak hirugarren eta bosgarren postua lortu dute 'Opinionated About Dining' (OAD) gidak osatzen duen Top 100+ European Restaurants 2018 zerrendan. Bestalde, Martin Berasategui jatetxea (49. postuan), Arzak (51. postuan), Mugaritz (61. postuan) eta Nerua (116. postuan) ere ageri dira zerrenda horretan.

Suitzako Schloss Schauenstein jatetxeak lortu du lehen postua, iaz gorenera heltzea lortu zuen Frantziako L'Arpege jatetxea ordezkatuz eta Suediako Fäviken jatetxeari aurrea hartuz.

Andreas Caminadaren Schloss Schauenstein jatetxeak 15. urteurrena beteko du aurten. Iaz bigarren postuarekin konformatu behar izan zuen Alain Passarden Parisko L'Arpege jatetxearen atzetik eta aurten lehenengo postura egin du jauzi. Steve Plotnicki estatubatuarrak sortu zuen Top 100+ European Restaurants zerrenda, eta urtero aukeratzen ditu Europako jatetxerik onenak. Gastronomia munduko 5.700 adituren botoak jasotzen dituzte horretarako.

Schloss Schauenstein jatetxearen atzetik, Magnus Nilssonen Fäviken jatetxea (2. postuan) eta Bittor Arginzonizen Etxebarri erretegia (3. postuan) ageri dira. Europako bost jatetxe onenaren zerrenda osatzeko laugarren tokian Alain Passard L'Arpège (bi urtez jarraian zerrendaburu izan dena) eta Eneko Atxak Larrabetzun duen Azurmendi jatetxea (5. postuan) daude.