FACUAk Last Tour salatu du BBK Liven janaria eta edariarekin sartzea galarazteagatik

FACUA kontsumitzaileen defentsarako elkarteak Last Tour Bilbao BBK Live 2018ko (uztailak 12, 13 eta 14an) antolatzailea salatu du Kontsumobideren aurrean, musika jaialdiaren esparrutik kanpo erositako edaria eta janaria esparruan sartzea debekatzeagatik.

FACUAk jakinarazi duenez, Bilbao BBK Live 2018ko web gunean, "informazio orokorra" sailean, erabiltzaileek jarraitu beharreko arauak argitaratu dituzte eta hor agertzen da, besteak beste, "kanpoko edariarekin eta janariarekin" sartzeko debekua.

Elkartearen esanetan, "Kontsumitzaileen eta Erabiltzaileen Defentsarako Lege Orokorraren arabera, kanpoko edariarekin eta janariarekin sartzea ez baimentzea abusuzko klausula da 82.1 artikuluak dioenez. Horren arabera, kontratuko aldeen eskubide eta betebeharren artean desoreka eragiten duten jarduerak" lirateke gehiegikeria sortzen dutenak.

Era berean, FACUAk azaldu duenez, Gaztela Mantxako Justizia Auzitegi Nagusiak zinema aretoetara janari eta edariarekin sartzeko debekuaren gainean emandako epai baten arabera, "ez da zentsuzkoa kontsumitzailearen aukeratzeko gaitasuna mugatzea" eta "aretoetara sartzea baldintzatzen bada, produktuen arabera, eta barruan soilik erositakoak kontsumitu ahal badira, modu ez zuenean eskatu ez dituen zerbitzuak derrigorrez erabiltzera behartzen da".

Halaber, Aecosan Kontsumo, Elikagaien Segurtasun eta Nutrizio Agentzia Espainiarrak 2016an plazaratutako txosten batek (zinema aretoetako debekuaren harira) "abusuzko klausula" ezartzen zutela ebatzi zuen, kontsumitzaileari "prestazio nagusia ukatzen baitzitzaion, modu bideagabean, sarrera ordaindu eta gero, aldebakarrez inposatutako baldintza batean oinarrituta, eskatu ez duen zerbitzu gehigarri batengatik, eta kontuan hartuta enpresaren jarduera nagusia ez dela janaria eta edariak saltzea".

Hala, elkartearen iritzian, "abusuzkoa da jaialdiaren instalazioetara sartzea galaraztea kanpoko elikagaiak eramanda, barrutian erositakoak baimenduta egonda". Erantsi duenez, "neurriak zentzua litzateke soilik horren moduko produktuak saltzea jarduera nagusia duten establezimenduen kasuan, esaterako, jatetxe batean".

Hori dela eta, FACUAk ekitaldi horretara eta horren moduko beste edozeinetara joatekoak diren erabiltzaileei horren moduko debekuen inguruan elkartea jakitun jartzea eskatu du.

Elkarteak, gainera, gogorarazi du bigarren aldia dela Last Tourren aurkako salaketa jartzen duela, BBK Liven abusuzko klausula ezartzeagatik. 2016an ere, Kontsumobidera jo zuen erabiltzaileei "cashless" ordaintzeko eskumuturrekoen bidez xahutu ez zuten dirua ez itzultzeagatik.