Idiazabalgo emakume bat hil da Mexikon, trafiko-istripua izanda

Idiazabalgo (Gipuzkoa) emakume bat hil da Mexikon, Cozumel uhartean, trafiko-istripua izanda, Euskadi Irratiak jakitera eman duenez.

Dirudienez, 33 urteko gidaria bikotekidearekin zegoen oporretan. Motoan zihoazen, eta ibilgailuaren kontrola galdu eta taxi baten kontra jo dute.

Bertan artatu eta ospitalera bizirik eraman dituzte, baina emakumeak buruan zuen kolpearen ondorioz, erietxean zendu dela baieztatu dute iturri ofizialek.

Berarekin zihoan gizona ere Idiazabalgoa da; zaurituta dago, baina zaurien larritasunaren berririk ez dute eman.