Gizartea -
Basque Culinary Center
Genetikaren eta etorkizuneko gastronomiaren arteko harremana aztertuko dute Donostian
Ikertzaileak, sukaldariak eta enpresaren munduko liderrak bilduko dira datorren ostegunean, Donostian, gastronomia, osasuna, nutrizioa, teknologia berriak eta berrikuntzaren azken joerak aztertzeko.
Agentziak | Erredakzioa
Datorren ostegunean (irailak 13) Basque Culinary Centerren egitekoa den Project Gastronomia: gastronomia pertsonalizatu baterantz 2050 ekimenean hainbat diziplinatako ikertzaileak, sukaldariak eta adituak eta enpresaren munduko liderrak bilduko dira, gastronomia, osasuna, nutrizioa, teknologia berriak eta berrikuntzaren munduko azken joerak aztertzeko.
Zergatik erantzuten du pertsona bakoitzak modu jakin batean dieta edo elikagai jakin baten aurrean? Zer-nolako eragina dute norbanako baten ezaugarri metabolikoek -geneek eta/edo hesteetako bakterioek- jaten duenarekiko erantzunean? Edo zer bilakaera izango du gastronomiak eta nutrizioak datozen 30 urteetan? galderei erantzuna emango diete sinposioan.
Etorkizuneko gastronomiaren xedea da pertsonen osasuna eta ongizatea hobetzea, plazerari eta zaporeari uko egin gabe, betiere.
Adituek gai ugari jarriko dituzte mahai gainean: nutrigenetika, jatetxeen industrian genetikaren erabileraren esperientziak, gaixotasun metabolikoak eta elikadura, kultura gastronomikoa ohitura osasuntsuen iturri gisa edo gastronomia osasuntsu baterako berrikuntza eta joerak, besteak beste.