Nafarroako Gobernua haserre Frantziarekin, hartz emeak Bearnora ekartzeagatik

Nafarroako Gobernua haserre dago Frantziako Gobernuarekin Bearnon (Pirinioak) hartz emeak barneratuko dituztelako, eta Frantziako exekutiboak ez diola horren berri eman salatu du, Nafarroako Foru Erkidegoan izan dezakeen eragina kontuan izanda.

Urriaren lehen hamabost egunotan Esloveniatik ekarriko dituzten bi hartz eme helduko dira Bearnora. Ildo horretan, erabakia atzera ez duela botako jakinarazi dio Frantziak Nafarroako Gobernuari, herriaren biodibertsitatearen kontserbaziorako estrategiaren menpe baitago erabakia.

"Nafarroako Gobernuaren eskakizunari erantzuteko, hartzaren barneratzearen inguruko informazio zehatza helaraziko diogu eta bilera egitea eskaini diogu", esan du Frantziako Gobernuak.

Hartzek herri nafarretan agertzea eta ganaduari kalteak eragitearen beldur da Nafarroako Gobernua, horregatik beharrezkotzat jotzen zuen aldez aurretik informazioa jaso izana, gaia behar bezala bideratzeko; batez ere, Erronkaribarren, Bearnotik gertu dagoelako, eta ganadua ingurumenerako eta garapenerako oinarrizkoa delako.