Neska adingabe batek sexu-abusuak salatu ditu Lasarte-Orian

Sexu-abusuak egin dizkiotela salatu du neska adingabe batek Lasarte-Orian, Segurtasun Sailak astelehen honetan jakitera eman duenez.

Larunbat gauean Lasarte-Oriako jarduera batean 16 urteko neska batek jasandako sexu-erasoa erabat arbuiatu eta gaitzetsi du astelehen honetan Udaleko Bozeramaileen Batzordeak. Ildo horretan, "emakumeen aurkako indarkeriarik gabeko gizarte bat eraikitzearekin duen konpromisoa" adierazi du.

"Horrelako erasoek erakusten digute administrazio publikoek nahiz gizarteak oraindik lan asko egin behar dugula bortizkeria matxista eta generozko desberdintasunerako jarrerak errotik desagerrarazteko", esan dute.

Hori horrela, bere babesa eta elkartasuna adierazi dio "eraso tamalgarri hori" jasan duen emakumeari, bai eta haren senitartekoei eta hurbilekoenei ere. "Erasotzaileen aurrean biktimak izandako jarrera balioetsi nahi du, emakumeen autodefentsaren eta ahalduntzearen adibide bat baita", gaineratu du Udalak.

Ertzaintzak ikerketa abiatu du salaketaren nondik norakoak argitzeko.

Bestalde, herritarrek eta erakundeek erasoa gaitzetsi dute Okendo plazan egindako elkarretaratze batean.

_________________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.