Bittor Oroz, pinuen gaitzaz: 'Udaberrira arte, onddoari aurre egiteko tartea dugu'

Lecanosticta acicola onddoak 40.000 hektarea pinudi harrapatu ditu dagoeneko Euskal Autonomia Erkidegoan (EAE). Eritasuna onddo batek sortzen du, eta "banda marroia" izenarekin ezaguna da, pinuetan uzten duen koloreagatik. Radio Euskadiko "Boulevard" saioan egin dioten elkarrizketan, lasaitasuna eskatu die Bittor Oroz Eusko Jaurlaritzako Nekazaritza, Arrantza eta Elikagaien Politikako sailburuordeak kaltetuei. Horren esanetan, udaberrira arte dago "kontraerasorako ekintzak" planifikatzeko, eta nazioarteko adituekin batera lanean ari dira. "Txilen eta Zeelanda Berrian gertatu da, eta kontrolatzea lortu dutela esan digute", azpimarratu du.

Sailburuordeak azaldu duenez, onddo beraren bi andui gurutzatu izanak eta baldintza klimatikoek eragin dute gaitza gehiago zabaltzea. "Ez die berehala eragiten pinuei; beraz, datorren urtean berriz agertuko da", gaineratu du.

Bestalde, erakunde guztiak konponbidea aurkitzeko lanean buru-belarri ari direla nabarmendu du, nahiz eta oraindik ez duten horren kontrako antidotorik topatu.

"Ez dago soluzio magikorik, baina ondorioak arindu ditzakegu", ziurtatu du.

Jatorrizko informazioa Radio Euskadik landu eta eitb.eus-ek itzuli du