Gazte bat auziperatu dute sanferminetako botilakadagatik

Iruñeko Instrukzio Epaitegiak sanferminetako txupinean, uztailaren 6an, izan ziren istiluen harira atzo atxilotuetako bat auziperatu du gazte madrildar bat larri zauritu zuen botila botatzea leporatuta.

Nafarroako Justizia Auzitegi Nagusiak adierazi du atzo atxilotutako 12 lagunetako bost libre geratu direla, baina desordenengatik eta autoritatearen kontrako atentatuagatik auziperatu dituzte eta auzitegira joan beharko dute hilean bitan.

Guardiako Epaitegian deklaratu ondoren, epaileak atxilotuetako bati gazte bat larri zauritu zuen botila botatzea leporatu dio.

Beste lau atxilotuk bihar deklaratuko dute epailearen aurrean, eta bien bitartean, atxilotutako adingabeak Adingabeen Fiskaltzaren esku utzi dituzte.

Istiluak iragan uztailaren 6an gertatu ziren San Fermin jaiei hasiera eman zien txupinaren aurretik, udaletxearen ondoko kale batean. Udaltzaingoaren kontra botilak jaurtitzen ari zen lagun talde bat eta botiletako batek 31 urteko madrildar bat jo zuen eta larri zauritu.

Zaurituari ebakuntza egin behar izan zioten eta Zainketa Berezien Unitatean egon zen zenbait egunez. Gainera, hitz egiteko gaitasuna eta gorputzaren eskuinaldeko mugikortasuna galdu zituen. Egun, Madrilgo errehabilitazio zentro batean dago.