Gazte bat atxilotu dute Hernanin bikotekideari ukabilkada emateagatik

Ertzaintzak 26 urteko gizon bat atxilotu du Hernanin, bikotekideari kalean mehatxu egin eta aurpegian ukabilkada bat emateagatik, Segurtasun Sailak jakinarazi duenez.

Gertakariak atzo gauean (21:00) jazo ziren, Zinkoenea plazan. Atxilotuak aurpegian jo zion emakumeari eta zauritu egin zuen. Odola zerion sudurretik eta han zeuden bizilagunek artatu zuten.

Biktimari laguntzera hurbildu zen gizon bat ere jo zuen, eta hainbat lesio eragin zizkion.

Abisua jaso ostean, Ertzaintzaren eta Udaltzaingoaren patruila bana bertaratu ziren. Erasotzaileak plazan jarraitzen zuen, emakumeari hil egingo zuela mehatxu eginez.

Ertzainek gizon gaztea atxilotu eta polizia-etxera eraman zuten. Hainbat deliturengatik aurrekariak ditu.

_______________________

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.