Abisu horia astelehenean, 4 metrorainoko olatuengatik

Segurtasun Sailak abisu horia izango du indarrean astelehenean, hilaren 10ean, euskal kostaldean; izan ere, 4 metrorainoko olatuak egon litezke.

Lehen bi milietako nabigaziorako abisua igandeko 15:00etan hasi da, eta asteleheneko 15:00etan indargabetuko dute.

Igande gauean, 4,5 metrokoak ere izan litezke olatu horiek. Astelehen goizean, olatuaren altuerak behera egingo du, eta 4 metrokoa izango da; arratsaldean, 3,5 metroetara jaitsiko da.

Gainera, igandetik astelehenera arteko gauean, asteleheneko 5:00etatik 7:00etara arteko tartean, Segurtasun Sailak abisu horia jarriko du indarrean, olatuek kostaldean izango duten talkagatik; izan ere, itsasgora 6:00etan izango da.

Iragarpena

Astelehenean, goizean, lainoak izango dira, eta zerua hodeitsu egongo da, bereziki Kantaurialdean, egunaren lehen orduetan. Eguerditik aurrera, aldiz, gero eta hodei gutxiago egongo dira zeruan, goi-hodei batzuk bakarrik. Goizaldean, prezipitazio arinak egon litezke, ekialdean eta itsasaldetik gertu, eta haizea ekialdetik ibiliko da, ahul.

Minimoetan, beherakada txikia izango da, eta maximoetan, aldiz, ez da aldaketarik izango. Izotza egin lezake Araban, puntu batzuetan, arin.