Gizartea -
Indarkeria matxista
Gizon bat atxilotu dute Gasteizen, bikotekideari erasotzeagatik
Arabako hiriburuko udaltzaingoak 49 urteko gizonezkoa atxilotu du, Aranbizkarra auzoan.
Agentziak | Erredakzioa
Gasteizko Udaltzaingoak 49 urteko gizonezko bat atxilotu du gauerdian, etxean izaten ari ziren liskar gogor batean, zeinetan biek lesioak egin baitituzte, bikotekideari erasotzea leporatuta.
Arabako hiriburuko Poliziak azaldu duenez, gertakariak 00:25ean jazo dira, Aranbizkarra auzoko pisu batean. Pertsona batek abisua eman du, bertan borroka bat izaten ari baitzen eta emakume bat laguntza eske ari baitzen.
Bertaratu direnean, agenteek zauriak zituen emakume bat eta hainbat atzamarkada eta aurpegia odoldua zituen gizonezko bat topatu dituzte.
Antza denez, eztabaida gogorra izan dute, une jakin batean gizonezkoak emakumezkoari eraso dio eta horrek aurka egin dio.
Agenteek gizonezkoa atxilotu dute, eta emakumeari ospitale batera eramatea eskaini diote, bertan arta zezaten, baina ezetz esan die.
Ustezko erasotzailea epailearen esku utzi dute gaur.
________________________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.
