Gizartea -
SALAKETA
SOS Arrazakeriak 'gizatasuna' eskatu du Donostian kalean lo egiten dutenekin
Erakunde sozialak salatu dutenez, ostegunean, udaletxeko subkontrata bateko langileek zaborretara bota zituzten kalean dauden hainbat pertsonaren kanping, lo-zakuak eta dokumentu pertsonalak.
AGENTZIAK | ERREDAKZIOA
Donostiako bide publikoan dauden trasteak erretiratzeko azpikontrataren lan-jarduna aldatzeko edo moldatzeko eskatu dio SOS Arrazakeriak Udalari, kalean lo egiten duten pertsonekin "gizatasun irizpide minimoak" erabil ditzaten.
Erakunde sozialak salatu dutenez, ostegunean, Udaleko subkontrata horretako langileek "zaborretara bota zituzten beste tokirik ez dutelako kalean lo egiten duten hainbat pertsonen kanpinak, lo-zakuak, mantak, abrigoak eta dokumentu pertsonal zein senideen argazkiak, besteak beste".
"Udal araudia arriskuan dauden pertsonen oinarrizko beharren aurretik al dago"? galdetu du SOS Arrazakeriak elkarteak.
Horregatik, Udalari enpresa horren jarduna egokitu eta "gizatasun irizpide minimoak" aplikatzeko eskatu dio, pertsona horien egoera ez dadin are gehiago okertu, "ekidin daitezkeen jarrera batzuen ondorioz".