Hiru pertsona zauritu dira Txorierriko igarobidean zortzi ibilgailuren arteko talkan

Zortzi ibilgailuk —bi kamioik, furgoneta batek eta bost autok— istripua izan dute gaur N-637 errepidean, Txorierriko igarobidean, eta hiru pertsona zauritu dira, Eusko Jaurlaritzako Segurtasun Sailak eitb.eus-i jakinarazi dionez.

Ezbeharra 09:50ean jazo da, Lezama parean eta Arrontegiko noranzkoan.

Hasiera batean, errepidea guztiz itxi behar izan dute, baina 10:20rako errei bat zabaldu dute. Trafiko Zuzendaritzaren arabera, hiru kilometrorainoko pilaketak sortu dira. Arazoa 12:15 aldera konpondu da.

Hiru pertsona zauritu dira, eta ospitalera eraman dituzte.

Aurretik ere izan da istripurik errepide honetan. 07:30ean, auto bat bidetik atera da Sondikan, eta ilara luzeak sortu dira han ere.