Gizartea -
Trafikoa
110 km/h-ko muga indarrean sartu denetik erdira jaitsi dira isunak
Gehiegizko abiaduran joategatik jarritako isunek nabarmen egin dute behera martxoan. DGTk emandako datuen arabera, autobideetako batez besteko abiadura 102,8 km/h-koa izan da.
Erredakzioa
110 km/h-ko neurria indarrean sartu denetik gehiegizko abiaduran joateagatik ipinitako isunak erdira jaitsi dira.
Autobideetan mantsoago gidatzen da orain. Iazko martxoan batez besteko abiadura 113,92 km/h-koa izan zen; aurtengoan, berriz, 102,08 km/h-koa izan da.
Espainiako Trafiko Zuzendaritza Nagusiak (DGT) emandako datuen arabera, oso ibilgailu gutxik gainditu dute 120 km/h-ko muga. Iaz autoen % 14,9 zihoazen muga hori gaindituta; 2011 urteko martxoan, ostera, % 6,9 baino ez.
Abiadura geldotzearen ondorioz, errepidean jarrita dauden radarrek arau-hauste gutxiago atzeman dituzte. Trafiko Zuzendaritzak emandako datuen arabera, 110 km/h-ko neurria indarrean sartu zen lehenengo astean nabaritu da batik bat isunen jaitsiera. Isunek % 60 egin dute behera aurreko hilabetearekin alderatuta. Otsaileko lehenengo astean 5.857 isun ipini zituzten eta joan den hilabeteko lehenengo zazpi egunetan, aldiz, 2.282.
