Gizartea -
Ekainaren 28an
Euskal hiriburuetan egingo dituzten protestetan parte hartzeko deia egin du EHGAMk
Gay eta Lesbianen Nazioarteko Eguna dela eta, Bilbon, Donostian, Gasteizen eta Iruñean manifestazioak egingo dituzte gaur, Euskal Herriko Gay-Les Askapen Mugimenduak antolatuta.
EiTB.EUS
Euskal Herriko Gay-Les Askapen Mugimenduak (EHGAM) manifestua igorri du, ekainaren 28an Gay eta Lesbianen Nazioarteko Eguna dela eta, euskal hiriburuetan egingo dituzten mobilizazioetan parte hartzeko deia eginez.
Bilbon, Jesusen Bihotza plazatik abiatuko da manifestazioa, 19:30ean. Ordu erdi lehenago hasiko da, Donostian, Boulevardetik aterako den martxa. Ordu berean, Gasteizko Andre Maria Zuriaren plazan elkartuko dira “Kaleetan Harro” leloari eutsita. Bukatzeko, Iruñean, Baluartetik ekingo diote protestari, 19:00ak jota.
Manifestuan adierazi dutenez, memoria eta ikusgarritasuna aldarrikatzen jarraituko dute. Ildo horretan, 50 urtez egindako borrokak emandako fruituak gogora ekarri eta aurrerantzean ere ildo berari eusteko asmoa erakutsi dute, oraindik ere “sistema heterosexuala dagoelako boterean”.
“Erasoak ez dira amaitu. Kolektiboko kideek kaleetan indarkeria jasan dugu, Skolae gisako programek mugak dituzte, Gasteizko apezpikuak adierazpen tamalgarriak egin ditu duela gutxi... Alegia, badira nahikoa arrazoi borrokan jarraitzeko”, esan dute manifestuan.
Guzti horren aurrean, isilik geratuko ez direla eta antolakuntza, autodefentsa eta borroka defendatzen jarraituko dutela azpimarratu dute.