Gizartea -
Donemiliaga udalerrian
Lagun bat zauritu da autoa errepidetik aterata eta trenbidean erorita, Mezkian
Istripuaren ondorioz, Adifek tren-zirkulazioa eten du. Geroago, zirkulazioa berrezarri dute, baina erreietako batean bakarrik.
AGENTZIAK | ERREDAKZIOA
Arabako A-4007tik zihoan ibilgailu bat errepidetik atera eta irauli da Mezkia parean, Arabako Donemiliaga udalerrian, eta trenbidean erori egin da, Eusko Jaurlaritzako Segurtasun Sailak eta SOS Deiak larrialdietarako zerbitzuek jakinarazi dutenez. Istripuaren ondorioz, tren-zirkulazioa etenda egon da. Gidaria zauritu da, eta Gasteizko Santiago ospitalera eraman dute.
Ezbeharra 13:55ak aldera jazo da. Argitu gabeko arrazoiengatik, Seat Ibiza auto bat errepidetik atera eta trenbidean erori da. Ertzaintza, suhiltzaileak eta anbulantzia bertaratu dira, eta gidaria ospitalera eraman dute.
Tren-zirkulazioa etenda egon da, bi noranzkoan. Autoa bertatik kendu dutenean, trenaren langileak katenaria-zutoia ikuskatzen ibili dira, tolestuta geratu baita. Azkenean, zirkulazioa berrezarri dute, baina erreietako batean bakarrik.